جیت کر قوم کو عید کا تحفہ دوں گا، اعصام الحق

نیویارک: گرینڈ سلیم یو ایس اوپن میں مکسڈ ڈبل اور مینز ڈبل کے فائنل میں جگہ بنانے والے پاکستانی ٹینس اسٹار اعصام الحق نے کہا ہے کہ کرکٹ اسکینڈل کے باعث کھیل کی دنیا میں پاکستان کو نقصان پہنچا ہے۔ فائل جیت کر پاکستانی قوم کو عید کا تحفہ دیں گے۔ میڈیا سے گفتگو کرتے ہوئے ٹینس اسٹار اعصام الحق نے کہا کہ ان کی کامیابیوں کے پیچھے ان کی ماں اور پاکستانی قومی کی دعائیں شامل ہیں۔ انہوں نے کہا کہ مینز ڈبلز کا فائنل جمعہ کے دن ہو گا۔ ان کی کوشش ہے کہ وہ اپنی قوم کو عید کا تحفہ دیں۔ انہوں کا کہنا ہے کہ سیمی فائنل میں پاکستانی اور بھارتی سفیر میچ دیکھنے آئے جس سے انہیں خوشی ہوئی۔ اگر اسی طرح خیر سگالی کے پیغامات اعلی سطح پر ہو جائیں تو پاکستان اور بھارت کے مسائل حل ہو جائیں گے۔ اعصام الحق کے بھارتی پارٹنر روہن بوپانا نے کہا ہے کہ کھیل اور سیاست الگ الگ چیزیں ہیں۔ جس طرح وہ اور اعصام مل کر کھیل سکتے ہیں اسی طرح پاکستانی اور ہندوستانی بھی اپنے مسائل کا حل تلاش کر سکتے ہیں۔