آصف کا برطانیہ میں سیاسی پناہ لینے پر غور

لندن: اسپاٹ فکسنگ اسکینڈل میں نامزد پاکستانی فاسٹ بالرمحمد آصف نے برطانیہ میں سیاسی پناہ لینے پرغور شروع کر دیا۔ برطانوی اخبار ڈیلی ٹیلی گراف نے دعوی کیا ہے کہ اسپاٹ فکسنگ اسکینڈل منظرعام پرآنے کے بعد محمد آصف برطانیہ میں سیاسی پناہ لینے پرغورکررہے ہیں۔ اس سلسلے میں انہوں نے گزشتہ ہفتے لندن میں امیگریشن وکیل کیساتھ ملاقات کی۔ اخبار کا دعوی ہے کہ سیاسی پناہ کے حصول کے لیے آصف نے موقف اختیارکیا ہے کہ لارڈزٹیسٹ کے دوران اسپاٹ فکسنگ اسکینڈل منظرعام پرآنے کے بعد انہیں پاکستان میں انڈر ورلڈ سٹے بازمافیا کی جانب سے تشدد کا نشانہ بنایا جاسکتا ہے۔ پینتیس منٹ جاری رہنے والی ملاقات میں امیگریشن وکیل نے محمد آصف کو مشورہ دیا ہے کہ وہ تحقیقات مکمل ہونے تک سیاسی پناہ کی درخواست نہ دیں۔ امیگریشن ایکسپرٹس کا کہنا ہے کہ اگرآصف یہ ثابت کردیں کہ پاکستان میں ان کی جان کو خطرہ ہے اور پاکستانی حکام انہیں سیکورٹی فراہم نہیں کرسکتے توان کا سیاسی پناہ کا کیس مضبوط ہوسکتا ہے۔ اسکاٹ لینڈ یارڈ محمدآصف، محمد عامراورسلمان بٹ پرعائد اسپاٹ فکسنگ کیالزامات کی تحقیقات کررہی ہے۔ پاکستان ہائی کمیشن نے معاملے پرتبصرہ کرنے سے انکارکردیا جبکہ منیجر پاکستان کرکٹ ٹیم یاور سعید کا کہنا ہے کہ انہیں آصف کے برطانیہ میں سیاسی پناہ لینے کے معاملے کا علم نہیں ہے۔