اعجاز بٹ کی وطن واپسی، شائقین سراپا احتجاج

لاہور: قومی ٹیم پر اسپاٹ فکسنگ کے الزامات کے بعد پی سی بی کے چیئرمین اعجاز بٹ کی وطن آمد کے موقع پر شائقین کرکٹ سراپا احتجاج بن گئے۔ ان کا کہنا تھا اسپاٹ فکسنگ کے الزامات ابھی تک ثابت نہیں ہوئے۔ برطانیہ سے لاہور آمد پر اعجاز بٹ کا شائقین نے بورڈ کے خلاف نعروں سے استقبال کیا۔ میڈیا سے گفتگو کے دوران بڑے پرسکون انداز میں جواب دیتے ہوئے اعجاز بٹ نے کہا کہ کھلاڑیوں پر الزامات نیوز آف دی ورلڈ کے آرٹیکل میں لگائے گئے۔ ابھی تک کچھ ثابت نہیں ہوا ہے۔ کھلاڑیوں سے نو گھنٹے پوچھ گچھ میں کوئی چارج نہیں لگایا گیا۔ ایک سوال پر چیئرمین پی سی بی نے کہا کہ الزام ثابت ہونے تک کسی کھلاڑی کے خلاف کوئی ایکشن نہیں لیا جائے گا۔ آئی سی سی اور اسکاٹ لینڈ یارڈ اپنی اپنی تحقیقات کررہی ہے اور انہیں امید ہے کھلاڑی بے گناہ ثابت ہوجائیں گے۔ تاہم الزامات درست ثابت ہونے کی صورت میں کھلاڑیوں کے خلاف ضرور کارروائی کی جائے گی۔ میڈیا کے سوالات کا جواب دینے کے بعد پولیس چیئرمین پی سی بی کو سخت سیکورٹی میں ایئرپورٹ سے باہر لے گئی۔