ٹی ٹوئنٹی سیریز میں شکست پر آفریدی مایوس

کارڈف: قومی ون ڈے ٹیم کے کپتان شاہد آفریدی نے انگلینڈ کیخلاف ٹی ٹوئنٹی سیریزمیں شکست پرسخت مایوسی کا اظہارکیا ہے۔ دوسرے ٹی ٹوئنٹی میچ کے بعد کارڈف میں میڈیا سے بات چیت کرتے ہوئے شاہد آفریدی نے کہا کہ پاکستان نے بہت برا کھیل پیش کیا۔ تمام بیٹسمینوں نے انتہائی غیرذمہ داری کا مظاہرہ کیا۔ انہوں نے کہا کہ ٹی ٹوئنٹی سیریز ہارنے کے بعد ون ڈے سیریز جیتنا کسی چیلنج سے کم نہیں ہوگا لیکن جو تھوڑا بہت وقت ملا ہے اس میں کوچ اورکھلاڑیوں کے ساتھ مل کر ون ڈے سیریز کیلئے نئی حکمت عملی ترتیب دیں گے۔ شاہد آفریدی نے کہا کہ پاکستان کرکٹ مشکل حالات سے دو چارہے لیکن بطورپروفیشنل اس کا اثرکھیل پرنہیں پڑنا چاہیے۔ اس مرحلے پرٹیم کا مورال بہت ڈاؤن ہے لیکن صرف ایک کامیابی سے کھلاڑیوں کے اعتماد میں اضافہ کیاجاسکتا ہے۔ آفریدی نے کہا کہ انہیں صرف ایک فتح درکارہے وہ ون ڈے سیریز میں اپنی ٹیم کواس طرح ہارتے ہوئے نہیں دیکھ سکتے۔ کپتان نے اعتراف کیا کہ عامر، آصف اورسلمان بٹ کے نہ ہونے سے بھی کارکردگی پراثرپڑا کیونکہ تینوں ہی ٹیم کے اہم کھلاڑی ہیں۔ آفریدی کا کہنا ہے کہ موجودہ حالات میں بطورکپتان ان کیلئے ہر چیزتبدیل ہوگئی ہے لیکن وہ اپنی ٹیم کو ضروراوپرلائیں گے۔