ٹی ٹوئنٹی:پاکستان کو انگلینڈ کے ہاتھوں شکست

کارڈف: عالمی چمپیئن انگلینڈ نے دوسرے ٹی ٹوئنٹی میچ میں پاکستان کو چھ وکٹوں سے شکست دے کر سیریز دو صفر سے جیت لی۔کارڈف میں کھیلے جانے والے میچ کا ٹاس پاکستان نے جیت کر پہلے بیٹنگ کرنے کا فیصلہ کیا۔ مہمان ٹیم کا آغاز اچھا نہ رہا اور کامران اکمل گیارہ رنز بنا کر پولین لوٹ گئے۔ محمد یوسف بھی زیادہ دیر تک وکٹ پر نہ ٹھر سکے اور چار رنز بناکر آوٴٹ ہوگئے۔ کپتان شاہد آفریدی دو رنز بناسکے۔ بائیس رنز پر چار وکٹیں گرنے کے بعد عمر اکمل نے کچھ مزاحمت کی تاہم وہ بھی سترہ رنز بناکر اپنی وکٹ گنوا بیٹھے۔ عبدالرزاق نے عمر گل کے ہمراہ آٹھویں وکٹ کے لئے انتیس رنز کی شراکت قائم کی۔ عمر گل نے سولہ اور عبدالرزاق نے گیارہ رنز بنائے۔ پاکستان کی پوری ٹیم انیسویں اوور میں نواسی رنز بناکر آوٴٹ ہوگئی۔ پاکستان کا ٹی ٹوئنٹی میں یہ اب تک کا سب سے کم ترین اسکور ہے۔ محمد حفیظ نے چودہ رنز اسکور کئے۔ انگلینڈ کی جانب سے ٹم بریسنن نے تین، اسٹورٹ براڈ، گریم سوان اور سائیڈ بوٹم نے دو دوکھلاڑیوں کو آوٴٹ کیا۔ جواب میں انگلینڈ نے مطلوبہ ہدف چودویں اوور میں چار وکٹوں کے نقصان پر حاصل کرلیا۔ پال کولنگووڈ اکیس رنز بناکر نمایاں رہے۔ پاکستان کی جانب سے شعیب اختر، سعید اجمل اور شاہد آفریدی نیایک ایک وکٹ حاصل کی۔