کھلاڑیوں کی معطلی انکوائری کا حصہ ہے، آئی سی سی

لندن: انٹرنیشنل کرکٹ کونسل کے چیف ایگزیکٹیوہارون لورگٹ نے کہا ہے کہ آئی سی سی کے پاس پاکستانی کھلاڑیوں کیخلاف ضابطہ اخلاق کی خلاف ورزی کے ثبوت موجود ہیں۔آئی سی سی کے چیف ایگزیکٹیوہارون لورگٹ نے لارڈزکرکٹ گراؤنڈ میں اینٹی کرپشن اینڈ سیکورٹی یونٹ کے چیئرمین رونی فلینگن کے ہمراہ پریس کانفرنس کرتے ہوئے کہا کہ پاکستانی کھلاڑیوں پراسپاٹ فکسنگ کے الزامات افسوسناک ہیں اس سے کرکٹ کے امیج کوبری طرح نقصان پہنچاہے۔ انہوں نے کہا کہ کھلاڑیوں کی معطلی انکوائری کا حصہ ہے۔ کھلاڑیوں پرچارج لگانے سے قبل شواہد اکٹھے کرنا چاہتے ہیں۔ اینٹی کرپشن اینڈ سیکورٹی یونٹ کے چیئرمین رونی فلینگن کا کہنا تھا کہ پاکستانی کھلاڑیوں پرلارڈزٹیسٹ میں اسپاٹ فکسنگ کے حوالے سے بہت سے چارجزہیں اورانہیں ان چارجزکا جواب تودینا پڑے گا۔ انہوں نے بتایاکہ آئی سی سی اپنی تحقیقات کا دائرہ کارپاکستان ٹیم کے دورہ آسٹریلیاتک بھی بڑھاسکتا ہے۔ انہوں نے کہا کہ اگرکھلاڑیوں کا جرم ثابت ہوگیا توان پرتاحیات پابندی بھی لگ سکتی ہے اورایسے میں نیوزآف دی ورلڈاخبارمبارکباد کا مستحق ہوگا۔ فلینگن نے برطانوی اخبار میں سلمان بٹ کے لاکرسے برآمد ہونے والے نشان زدہ نوٹوں کی خبرپرتبصرہ کرنے سے انکارکردیا۔ ہارون لورگٹ نے کہا کہ پاکستانی ہائی کمشنرواجد شمس الحسن سے ملاقات میں کھلاڑیوں کونوٹس بھجوانے کا عندیہ دیدیا تھا۔ انہوں نے کہا کہ آئی سی سی صرف افواہوں پرکان نہیں دھرسکتی، میچ فکسنگ میں کارروائی کیلئے ٹھوس شواہد کا ہونا ضروری ہے۔ انہوں نے اس تاثرکومستردکردیا کہ پاکستان کیخلاف کسی قسم کی سازش کی جارہی ہے۔