اسپاٹ فکسنگ کے الزامات پر دکھ ہے، کپل دیو

نئی دہلی: سابق بھارتی کپتان کپل دیو نے کہا ہے کہ پاکستانی کھلاڑیوں پر اسپاٹ فکسنگ کے الزامات پر دکھ ہے لیکن اگر الزامات ثابت ہوجائیں تو انہیں سخت سزا ملنی چاہیے۔ انیس سو تراسی کے عالمی کپ کی فاتح ٹیم کے کپتان کپل دیو کا کہنا ہے کہ پاکستانی کرکٹرزپراسپاٹ فکسنگ کے الزامات لگائے جانے پر انہیں دکھ ہے لیکن اگرکرکٹرزنے کوئی غلط کام کیا ہے تواس کی سزا بھی ملنی چاہیے تاکہ مستقبل میں دوبارہ کوئی ایسی حرکت نہ کرسکے۔ کپل دیو نے سابق کپتان عمران خان سے اپیل کی کہ وہ پاکستان کرکٹ کے معاملات سنبھالنے کیلئے آگے آئیں۔ انہوں نے کہا کہ میں عمران خان سے درخواست کروں گا کہ وہ پاکستان کرکٹ کے معاملات سنبھال لیں کیونکہ وہ دنیا کے سب سے شفاف کرکٹرہیں۔ اگر وہ پاکستان کرکٹ کے معاملات سنبھال لیتے ہیں تویہ اچھا ہوگا۔ ہم نہیں چاہتے کہ پاکستان کرکٹ ختم ہوجائے۔ انہوں نے کہا کہ پاکستان نے دنیائے کرکٹ میں بڑے بڑے نام پیدا کئے ہیں۔