قومی ٹیم میں گروپ بندی برقرار ہے، جلال الدین

کراچی: سابق ٹیسٹ کرکٹر جلال الدین کا کہنا ہے کہ تین کھلاڑیوں کو اسکواڈ سے ڈراپ کیئے جانے کے باوجود متبادل پلیئرز کو طلب نہ کرنا ٹیم میں گروپ بندی کی واضح مثال ہے۔ کراچی میں آج نیوز سے خصوصی گفتگو کرتے ہوئے جلال الدین نے کہا کہ سلمان بٹ، محمد آصف اور محمد عامر کے خلاف اسپاٹ فکسنگ کے الزامات کے بعد ان کو ڈراپ کرنا وقت کی مناسبت سے درست فیصلہ ہے۔ پاکستان کرکٹ بورڈ کو اس حوالے سے اپنا واضح موقف پیش کرنا چاہیے کہ وہ کھلاڑیوں کا دفاع کررہے ہیں یا حقائق کا ساتھ دیں گے۔ انہوں نے کہا کہ قومی ٹیم پر اب بھی مافیا حاوی ہے جو آخری وقت تک چاہتا ہے کہ گروپ بندی برقرا رہے۔ جلال الدین نے مزید کہا کہ پی سی بی اب بھی اہل کھلاڑیوں کو ٹیم میں شامل کرسکتا ہے تاکہ ون ڈے سیریز میں بہتر نتائج حاصل کیے جاسکیں۔