الزام ثابت ہونے تک کھلاڑی بے قصور ہیں، شہریار

کراچی: پاکستان کرکٹ بورڈ کے سابق چیئرمین شہریار خان کا کہنا ہے کہ جب تک کھلاڑیوں پر الزامات ثابت نہیں ہوجاتے وہ بے قصور ہیں۔ شہریار خان کا کہنا ہے کہ کھلاڑیوں پر ماضی میں بھی الزامات لگتے رہے ہیں لیکن ٹھوس ثبوت کے بغیر کسی کو قصور وار نہیں ٹھرایا گیا۔ ان کا کہنا ہے کہ کرکٹ میں میچ فکسنگ ماضی کا حصہ بھی رہی ہے لیکن شواہد کی کمی کے باعث کبھی کسی کرکٹر کو عبرت کا نشان نہیں بنایا جاسکا۔ شہریار خان نے کہا کہ اسکاٹ لینڈ یارڈ کو اب تک سلمان بٹ ، محمد عامر اور محمد آصف کے خلاف کوئی ثبوت نہیں ملا ہے اور جب تک انہیں قانون سزا نہیں دے دیتا تو وہ اور عوام کون ہوتے ہیں انہیں گناہ گار کہنے والے۔