پاک، انگلینڈ ٹی ٹوئنٹی: لاکھوں پاؤنڈ کا سٹہ کھیلا جائیگا

کراچی: برطانوی میڈیا پاکستانی کھلاڑیوں کواسپاٹ فکسنگ اسکینڈل میں ملوث کرنے پرتلا ہواہے لیکن دوسری جانب برطانوی لیگل بیٹنگ انڈسٹری میں پاکستان اورانگلینڈ کے درمیان پہلے ٹی ٹوئنٹی میچ پرلاکھوں پاؤنڈز کا قانونی سٹہ کھیلا جائے گا۔ برطانیہ میں سٹے بازی کی قانونی ویب سائٹ ولیم ہل کے مطابق پاکستانی کھلاڑیوں پرلگنے والے اسپاٹ فکسنگ کے الزامات کا پاکستان اورانگلینڈ کے درمیان اتوارکوکھیلے جانیوالے پہلے ٹی ٹوئنٹی میچ پرکوئی اثرنہیں پڑے گا۔ ولیم ہل نے پہلے ٹی ٹوئنٹی میچ میں پاکستان کی پہلی بال نوبال ہونے پر دس ایک کا بھاؤ دیا ہے۔ پہلی بال ڈاٹ بال ہونے پر ایک ایک، بیٹ سے رنزبننے پرگیارہ آٹھ، بائی اورلیگ بائی کی صورت میں سات ایک، وائیڈ پرآٹھ ایک اوروکٹ گرنے پر دس ایک کا بھاؤ دیا گیا ہے۔ تین پاکستانی کرکٹرزکومعطل کئے جانے کے بعد پہلے ٹی ٹوئنٹی میچ میں انگلینڈ کی کامیابی کا ریٹ آٹھ تیرہ سے چار سات ہو گیا ہے۔ پاکستان کی فتح کا بھاؤ پانچ چارہے۔ ولیم ہل نے نوجوان پاکستانی فاسٹ بالر محمد عامرکے دوبارہ پاکستان کی طرف سے کھیلنے پر ایک چھ اور نہ کھیلنے پر سات دو کا ریٹ آفر کیا ہے۔