آئی سی سی کے فیصلے سے دھچکا لگا، واجد شمس

لندن: برطانیہ میں پاکستانی ہائی کمشنر واجد شمس الحسن نے کہا ہے کہ پاکستانی کرکٹرز کی معطلی کے بارے میں آئی سی سی کے فیصلے سے انہیں شدید دھچکا لگا ہے۔ معطلی کی کوئی قانونی وجہ نہیں بتائی گئی۔ معاملے کی انکوائری برطانوی پولیس کررہی ہے آئی سی سی نہیں۔ آئی سی سی کی جانب سے محمد آصف ، محمد عامر اور سلمان بٹ کو معطل کیے جانے کے بعد برطانیہ میں پاکستانی ہائی کمشنر نے ایک بیان میں پاکستانی کھلاڑیوں کی معطلی کے فیصلے کو شدید تنقید کا نشانہ بنایا۔ ان کا کہنا تھا کہ آئی سی سی کے چیف ایگزیکٹو نے لندن میں پاکستانی سفارت خانے کا دورہ کیا تھا اور وعدہ کیا تھا کہ الزامات ثابت ہونے تک پاکستانی کھلاڑیوں کے خلاف کوئی کارروائی نہیں کی جائے گی۔ اسپاٹ فکسنگ کے معاملے کی تحقیقات برطانوی پولیس کر رہی ہے اور ایک انکوائری کے دوران دوسری انکوائری نہیں ہو سکتی۔ ان کا کہنا ہے کہ آئی سی سی نے پاکستانی کھلاڑیوں کی معطلی کی کوئی قانونی وجہ نہیں بتائی ہے۔