ٹورمیچ: پاکستان سمر سیٹ کیخلاف فتحیاب

ٹاؤنٹن: پاکستان نے ٹور میچ میں سمرسیٹ کوآٹھ رنز سے شکست دے دی۔ٹاونٹن میں کھیلے جانے والے میچ کا ٹاس سمرسیٹ نے جیت کر پہلے پاکستان کو بیٹنگ کی دعوت دی۔ قومی ٹیم نے اننگز کا آغاز کیا تو چھ کے مجموعی اسکور پر محمد حفیظ اور اظہر علی بغیر کوئی رن بنائے پویلین لوٹ گئے۔ تجربہ کار بیٹسمین محمد یوسف بھی چھبیس رنز بناکر رن آؤٹ ہوگئے جس کے بعد شاہ زیب حسن اور فواد عالم نے عمدہ بیٹنگ کرتے ہوئے اسکور کو آگے بڑھایا۔ شاہ زیب حسن ایک سو پانچ اور فواد عالم ستانوے رنز بنا کر آؤٹ ہوئے۔ پاکستان کی پوری ٹیم اڑتالیسویں اوور میں دو سو چونسٹھ رنز پر ڈھیر ہوگئی۔ لوئیس گریگری نے چار اور مارک ٹرنر نے تین وکٹیں حاصل کیں۔ جواب میں میزبان ٹیم مقررہ پچاس اوورز میں نو وکٹوں پر دو سو چھپن رنز تک محدود رہی۔ زینڈر ڈی برائن ایک سو بائیس رنز بناکر ناقابل شکست رہے۔ کومپٹن نے پچاس رنز بنائے۔ عمرگل اور سعید اجمل نے تین تین جبکہ شاہد آفریدی نے دو بیٹسمینوں کو آؤٹ کیا۔