کولمبو ٹیسٹ: بھارت کی ستائیس رنز کی برتری

کولمبو:  بھارتی کرکٹ ٹیم نے کولمبو ٹیسٹ کی پہلی اننگز میں نو وکٹوں کے نقصان پر چھ سو انہتر رنز بنا لئے ہیں۔کولمبو میں جاری ٹیسٹ کے چوتھے روز بھارت نے پہلی نامکمل اننگ چار سو بیاسی رنز تین کھلاڑی آؤٹ پر دوبارہ شروع کی تو سچن ٹنڈولکر ایک سو آٹھ اور سریش رائنا چھیاسٹھ رنز پر بیٹنگ کر رہے تھے۔ دونوں کھلاڑیوں نے عمدہ بیٹنگ کرتے ہوئے چوتھی وکٹ کی شراکت میں دو سو چھپن رنز کا اضافہ کیا۔ رائنا نے ڈیبیو میچ پر سنچری اسکور کی وہ ایک سو بیس رنز بنا کر اجنتھا مینڈس کا شکار بنے۔ سچن ٹنڈولکرنے ٹیسٹ کرکٹ میں پانچویں ڈبل سنچری اسکور کی۔ چوتھے روز کھیل کے اختتام تک بھارت نے نو وکٹوں کے نقصان پر چھ سو انہتر رنز بنائے تھے۔ اور اسے میزبان ٹیم پر ستائیس رنز کی برتری حاصل ہوگئی ۔ ایشانت شرما دس اور پرگیان اوجھا بغیر کوئی رن بنائے وکٹ پر موجود ہیں۔ اجنتھا مینڈس نے چار اور تلکرتنے دلشان نے تین کھلاڑیوں کو آؤٹ کیا۔