اے ٹی پی ٹینس: اعصام اور بھوپننا کوارٹر فائنل میں

لاس اینجلس: پاکستان کے نمبر ون ٹینس اسٹار اعصام الحق قریشی اور بھارت کے روہن بھوپننا کی جوڑی نے اے ٹی پی فارمرز کلاسک چیمپئین شپ کے کوارٹر فائنل میں جگہ بنالی۔لاس اینجلس میں جاری چیمپئین شپ کے دوسرے راؤنڈ میں پاکستان کے اعصام الحق اور بھارت کے روہن بھوپننا کی جوڑی نے برطانیہ کے کولن فلیمنگ اور کین اسکوپسکی کی جوڑی کو ایک سیٹ کے خسارے میں جانے کے باوجود شکست دی۔ پاک بھارت جوڑی کو پہلے سیٹ میں ٹائی بریک پر سات چھ سے شکست کا سامنا کرنا پڑا۔ جس کے بعد اعصام اور روہن نے کم بیک کیا یکے بعد دیگرے دو سیٹ جیت کر میچ اپنے نام کرلیا۔ پاک بھارت جوڑی کی فتح کا اسکور چھ سات، چھ صفر اور دس سات رہا۔ عمان میں جاری آئی ٹی ایف جونئیر ٹو ورلڈ رینکنگ اوپن انٹرنیشنل ٹینس ٹورنامنٹ میں پاکستان کے سمیر افتخار نے ترکی کے کیم ایلکیل کو اسٹریٹ سیٹس میں چھ ایک اور چھ دو سے شکست دے کر سیمی فائنل میں جگہ بنالی۔ اس سے قبل سمیر افتخار کوئیت کے سلطان زید کے ہمراہ ایونٹ کا ڈبلز ٹائٹل اپنے نام کرچکے ہیں۔