کراچی: بارش، نیشنل کوچنک سینٹر کی چھتیں ٹپکنے لگیں

کراچی: بارش کی وجہ سے کراچی میں نیشنل کوچنگ سینٹر کی چھتیں ٹپکنے لگیں، رنگ میں پانی بھر جانے کے سبب قومی باکسنگ ٹیم کا تربیتی کیمپ تعطل کا شکار ہوگیا۔ پاکستان اسپورٹس بورڈ کے نیشنل کوچنگ اینڈ ٹریننگ سینٹر کراچی میں ان دنوں کامن ویلتھ اور ایشین گیمزکے لیے قومی باکسنگ ٹیم کا تربیتی کیمپ لگا ہوا ہے۔ لیکن شہر قائد میں ہونے والی شدید بارشوں کے سبب باکسنگ ہال کی چھت ٹپکنے لگی ہے جس کے بعد کھلاڑیوں نے وہاں پریکٹس سیشن سے گریز کیا۔ جب اس صورت حال کی اطلاع قومی اسمبلی کے چیئرمین قائمہ کمیٹی برائے کھیل اقبال محمد علی کو ملی تو وہ خود ہال کے معائنے کے لیے کوچنگ سینٹر پہنچ گئے۔ اقبال محمد علی نے ڈائریکٹر جنرل پاکستان اسپورٹس بورڈ کو فون کرکے سخت برہمی کا اظہار کیا۔ پاکستان باکسنگ فیڈریشن کے سیکریٹری محمد اکرم خان اور ٹیم کے کیوبن کوچ فرانسسکو ہرنینڈو کا کہنا تھا کہ وہ زیادہ کچھ نہیں صرف مناسب سہولیات کے طلب گار ہیں۔ تاکہ میگا ایونٹ کی تیاری کرسکیں۔ باکسنگ کھیل کے ذریعے پاکستان نے کئی بین الاقوامی مقابلوں میں میڈلز جیتے لیکن اب یہ کھیل عدم توجہ کا شکار ہے۔