پی سی بی:مالی بے ضابطگی،قائمہ کمیٹی نے نوٹس لے لیا

اسلام آباد: کھیل کے بارے میں قومی اسمبلی اور سینیٹ کی قائمہ کمیٹیوں نے پاکستان کرکٹ بورڈ میں پچاس کروڑ روپے سے زائد کی مالی بے ضابطگیوں کا نوٹس لے لیا۔ آئندہ ہفتے دو سابق چیئرمینوں سمیت پندرہ افراد کو طلب کرنے کا فیصلہ کیا گیا ہے۔ ذرائع کے مطابق قائمہ کمیٹیوں نے پی سی بی کی ایڈٹ رپورٹ میں سنگین مالی بے قاعدگیاں سامنے آنے پر سخت تشویش کا اظہار کیا ہے۔ قومی اسمبلی اور سینیٹ کی قائمہ کمیٹیوں کے خصوصی اجلاس آئندہ ہفتے بلانے کا فیصلہ کیا گیا ہے جن میں پی سی بی کے سابق چیئرمین شہریار خان، عباس زیدی، ڈاکٹر نسیم اشرف، شفقت نغمی ، ندیم اکرم ، احسن حمید ملک ، عارف کچلو ، حسن احمد، ذاکر خان ، مشتاق احمد ،سلمان ناز، احمر ملک ، خرم ملک ، اسد مصطفٰی اور سبحان کو طلب کیا جائے گا۔ قومی اسمبلی کی قائمہ کمیٹی کے چیئرمین جمشید دستی نے آج نیوز کو بتایا کہ بے ضابطگیوں میں ملوث افراد کے خلاف ایف آئی اے سے تحقیقات کرانے کی سفارش کی جائے گی۔کرپشن ثابت ہونے پر انکی جائیدایں ضبط ہوں گی۔ ان کا کہنا تھا کہ ڈاکٹر نسیم اشرف کو انٹرپول کے ذریعے واپس لانے کیلئے وزارت داخلہ کو خط لکھ دیا ہے۔ سینیٹ کی قائمہ کمیٹی کے سینئر رکن سینٹر ہارون اختر نے کہا کہ جن افراد کے نام سامنے آئے ہیں انہیں صفائی کا پورا موقع دیا جائے گا،تاہم کرپشن کرنے والوں کو اب بھاگنے نہیں دیں گے۔