کچھ عناصرفیڈریشن پرقبضہ چاہتے ہیں، سابق اولمپئنز

کراچی: سابق ہاکی اولمپئینزنے کہاہے کہ کچھ سازشی عناصرفیڈریشن پرقبضہ کرناچاہتے ہیں۔ سابق اولمپئین ارشد چوہدری، انجم سعید، محمدعثمان، زاہد شریف، اشتیاق احمد اوردیگرنے لاہورمیں میڈیا سے گفتگوکرتے ہوئے کہا کہ ایک مخصوص ٹولہ سازش کر کے فیڈریشن پرقبضہ کرنا چاہتا ہے۔ انہوں نے کہا کہ اس ٹولے کو ماضی میں کئی مواقع ملے لیکن وہ ہاکی کی بہتری کیلئے کچھ نہ کرسکے۔ موجودہ فیڈریشن نے صفرسے اسٹارٹ لیا تھا اب جونیئراورسینئرزکی سطح پربہترنتائج آنے شروع ہوئے ہیں لیکن ورلڈکپ میں سینئرپلیئرزکی ناقص کارکردگی کی وجہ سے ٹیم بارہویں پوزیشن پرآئی۔ سابق اولمپئینزکا کہناتھا کہ ہاکی کی بہتری کیلئے غیرملکی کوچ کی خدمات حاصل کرنی چاہیے اوراسے مکمل اختیارات دینے چاہیے۔ کراچی میں پریس کانفرنس کرتے ہوئے برطرف کوچ شاہد علی خان، سابق پلیئردانش کلیم، سلیم شیروانی اوراحمدعالم نے کہا کہ ہاکی کی بہتری کیلئے سیکریٹری آصف باجوہ کی حمایت جاری رکھیں گے۔ شاہد علی خان نے شکست کی ذمہ داری قبول کرتے ہوئے کہا کہ موجودہ ٹیم کا کوئی کھلاڑی میچ فکسنگ میں ملوث نہیں۔ انہوں نے کہا کہ سینئرکھلاڑیوں کوکھلانے کا فیصلہ ان کا اپنا تھا۔