میچ فکسنگ کے شواہد مل گئے، قائمہ کمیٹی

لاہور: سینٹ کی قائمہ کمیٹی برائے کھیل کی ذیلی کمیٹی کے ارکان کا کہنا ہے کہ دورہ آسٹریلیا میں ایک سے زائد پاکستانی کھلاڑی میچ فکسنگ میں ملوث تھے۔لاہور میں پاکستان کرکٹ بورڈکے حکام کے ساتھ میٹنگ کے بعد میڈیا سے گفتگو کرتے ہوئے سینٹ کی قائمہ کمیٹی برائے کھیل کی ذیلی کمیٹی کے رکن ہارون اختراورطاہرمشہدی نے کہا کہ بورڈ نے جو شواہد دکھائے ہیں اس سے یہی لگتا ہے کہ دورہ آسٹریلیا میں کچھ کھلاڑی میچ فکسنگ میں ملوث تھے۔ انہوں نے کہا کہ وہ اس وقت ان کھلاڑیوں کا نام نہیں بتانا چاہتے کیونکہ ان کے ساتھ اورلوگ بھی ملوث ہیں۔ ان کا کہنا تھا کہ گروپ بندی، میچ فکسنگ اوردیگرعوامل کی وجہ سے شکست کا سامنا کرناپڑا۔ انہوں نے کہا کہ اگرمیچ فکسنگ میں ملوث کوئی کھلاڑی موجودہ ٹیم کا حصہ ہے تووہ اسے ٹیم سے نکالنے کیلئے پی سی بی سے سفارش کریں گے۔ سینیٹر طاہر مشہدی کا کہنا تھا کہ پی سی بی کی مالی پوزیشن مستحکم ہے، بورڈ نے دوہزار آٹھ سے اپنے اخراجات میں نمایاں کمی کی ہے۔ انہوں نے کہا کہ غیر ملکی ٹیموں کے پاکستان نہ آنے سے بورڈ کو بہت نقصان ہوا۔ کمیٹی کے چیئرمین سینیٹرعبدالغفارقریشی کا کہنا تھا کہ جاوید میانداداورچیئرمین پی سی بی کے درمیان اختلافات دورہوگئے ہیں۔ ان کا کہنا تھا کہ محمد یوسف اور یونس خان پر کوئی پابندی نہیں ہے، بورڈ جب چاہے انہیں ٹیم میں شامل کرسکتا ہے۔