کیویز نے دورہ زمبابوے منسوخ کردیا

ویلنگٹن: نیوزی لینڈ نے سیکورٹی خدشات کے سبب کرکٹ ٹیم کا دورہ زمبابوے منسوخ کردیا۔ دونوں ممالک کے درمیان ون ڈے سیریزدوہزارگیارہ میں نیوٹرل وینیوپرکھیلی جاسکتی ہے۔ نیوزی لینڈ کرکٹ ٹیم کوتین ون ڈے میچوں کے لئے گزشتہ سال جولائی میں زمبابوے کا دورہ کرنا تھا تاہم سیکورٹی خدشات کے سبب دونوں کرکٹ بورڈکے حکام کی باہمی مشاورت سے اسے رواں سال جون تک ملتوی کردیا گیا تھا۔ نیوزی لینڈ کرکٹ کے چیف ایگزیکٹیوجسٹن وان کے مطابق گزشتہ ایک سال کے دوران زمبابوے میں سیکورٹی کی صورتحال میں بہتری نہیں آئی جبکہ غیریقینی سیاسی صورتحال کے سبب وہاں صحت اوردیگر سہولیات کابھی فقدان ہے اس لئے کرکٹ نیوزی لینڈ نے حکومت کی مشاورت سے ٹیم کا دورہ منسوخ کردیا۔ انہوں نے کہا کہ زمبابوے کیخلاف ون ڈے سیریزجون دوہزارگیارہ میں جنوبی افریقہ یا کسی اورنیوٹرل وینیوپرکھیلی جاسکتی ہے۔ کرکٹ زمبابوے نے نیوزی لینڈ کے فیصلے پراحتجاج کیا ہے۔