پاک پولو کپ لاہور چٹخارہ کے نام

لاہور: لاہور چٹخارہ نے ماسٹرز کو سخت مقابلے کے بعد شکست دے کر پاکستان پولو کپ ٹورنامنٹ جیت لیا۔ میچ کے دوران ایک تماشائی کو دل کا دورہ پڑا اور فوری طبی امداد نہ ملنے کے باعث وہ جاں بحق ہو گیا۔لاہور پولو کلب میں کھیلے جانے والے اس ٹورنامنٹ کے فائنل میں دونوں ٹیموں نے تیز رفتاری سے کھیل کا آغاز کیا اور برتری حاصل کرنے کے لئے ایک دوسرے کے گول پوسٹ پر خوب حملے کئے تاہم لاہور چٹخارہ نے ماسٹرز کو سات کے مقابلے میں ساڑھے سات گول سے ہرا کر ٹورنامنٹ اپنے نام کیا۔ فاتح ٹیم کے شاہ شمعیل عالم نے چار اور تیمور معاذ خان نے دو جبکہ مدمقابل ٹیم کے حسام علی حیدر نے چھ گول کئے۔ مہمان خصوصی پبلک اکاوٴنٹس کمیٹی پنجاب کے چیئرمین عبدالقادر گیلانی نے انعامات تقسیم کئے۔ فائنل کے تیسرے چکر کے دوران ایک تماشائی وقار کو اچانک دل کا دورہ پڑا مگر وہاں کسی نے اسے فوری طبی امداد کے لئے اسپتال نہیں پہنچایا۔ وزیر اعظم کے بیٹے عبدالقادر گیلانی کی گاڑیوں کا اسکواڈ بھی کھڑا تھا اس کے باوجود ریسکیو ڈبل ون ٹو کو بلایا گیا جو انہیں اسپتال لے کر گئے جہاں ڈاکٹروں نے ان کی موت کی تصدیق کر دی۔