سابق اولپمینئز کا ہاکی بچاؤ مہم کا اعلان

کراچی: سابق اولپمینئز نے ہاکی بچاؤ مہم کا اعلان کرتے ہوئے تین روز میں سیکرٹری آصف باجوہ کی برطرفی کا مطالبہ کر دیا۔ کراچی میں اولمپیئن قمر ضیاء کی رہائش گاہ پراصلاح الدین، اخترالاسلام ، ایاز محمود ، قمرابراہیم، وسیم فیروز،اور میزبان اولمپیئن نے مشترکہ پریس کانفرنس کی۔ سابق ہیروز نے کہا کہ انہیں کسی عہدے کی لالچ نہیں وہ قومی ہاکی کو بچانا چاہتے ہیں۔ سابق کپتان اصلاح الدین نے کہا کہ بیک ڈور سے آنے والوں کو فرنٹ ڈور سے جانا ہوگا۔ اولمپیئن اخترالاسلام نے کہا کہ وہ صرف قومی ہاکی کی بہتری چاہتے ہیں۔ اولمپیئن قمر ضیاء کا کہنا تھا کہ آصف باجوہ کو مستعفی ہونے کے لیے تین دن کی ڈیڈ لائن دی ہے اگر ایسا نہ ہوا تو وہ صدر مملکت اور وزیراعظم تک جائیں گے۔ قمر ضیا نے دعویٰ کیا کہ انہیں بیالیس اولمپینزاورسینتالیس انٹرنیشنل کھلاڑیوں کی حمایت حاصل ہے۔