قومی ہاکی ٹیم کی واپسی، شائقین کا احتجاج

لاہور: ورلڈ کپ میں بدترین کارکردگی کا مظاہرہ کرنے والی قومی ہاکی ٹیم کی لاہور آمد پر شائقین نے احتجاج کیا،قومی ٹیم کے کوچ نے شکست پر قوم سے معافی مانگ لی اور کہا کہ سابق اولمپیئنز تنقید کے بجائے بہتری کیلئے تجاویز دیں۔ورلڈ کپ کی تاریخ میں پہلی بار بارہویں پوزیشن حاصل کرنے والی قومی ٹیم نئی دہلی سے لاہور کے علامہ اقبال انٹرنیشنل ائیرپورٹ پہنچی تو وہاں موجود ہاکی لوررز نے بری پرفارمنس پر کھلاڑیوں اور ٹیم مینجمنٹ کے خلاف نعرے باری کی اور فیڈریشن کی تبدیلی کا مطالبہ کیا۔ اس موقعے پر قومی ٹیم کے برطرف کوچ شاہد علی خان نے کہا کہ فتوحات کا کریڈٹ لینے کی طرح وہ اس شرمناک شکست کی ذمہ داری بھی قبول کرتے ہیں تاہم اس ناکامی سے پاکستان ہاکی ختم نہیں ہوئی۔سابق اولمپیئنز مشکل کی اس گھڑی میں شازشوں کے بجائے مثبت تجاویز دیں۔انہوں نے کہا کہ یہ تاثر درست نہیں ہے کہ تمام فیصلے آصف باجوہ نے کئے بلکہ بطور کوچ فیصلوں میں ان کی مشاورت بھی شامل تھی۔برطرف مینیجر آصف باجوہ نے کہا کہ بلاشبہ پاکستان ہاکی کی تاریخ میں ایسی شکست کی مثال نہیں ملتی توہ اس کا ہرگز دفاع نہیں کریں گے،جہاں تک ان کی ذات کی بات ہے تو ان کے مستقبل کا فیصلہ پی ایچ ایف کے صدر کریں گے۔ سینئر کھلاڑی ریحان بٹ نے کہا کہ قوم کی توقعات پر پورا نہ اترنے پر کھلاڑی قوم سے شرمندہ ہیں اور اس لئے انہوں نے مشترکہ ریٹائرمنٹ لینے کا اعلان کیاجس پر وہ قائم ہیں تاہم کھلاڑیوں کے مستقبل کا فیصلہ فیڈریشن نے کرنا ہے۔پی ایچ ایف ایگزیکٹیو بورڈ کا اجلاس آئندہ ہفتے ہوگا جس میں ورلڈ کپ میں شرمناک شکست کی تحقیقات کیلئے اعلیٰ سطحی کمیٹی تشکیل دی جائے گی جس کی رپورٹ کی روشنی میں سخت فیصلے کئے جائیں گے۔