اسلام آباد: طلبا کے سالانہ کھیلوں کا انعقاد

اسلام آباد: اسلام آباد میں طلبا کے سالانہ کھیلوں کا انعقاد، رنگا رنگ مقابلوں میں پنجاب اور سرحد کے مختلف اسکولوں سے تعلق رکھنے والے طلبا نے اپنی صلاحیتوں کا بھرپور مظاہرہ کیا۔ طلبا و طالبات نے چار سو میٹر ریس، آٹھ سو میٹر ریس اور لانگ جمپ سمیت مختلف ایونٹس میں حصہ لیا، گیمز میں حصہ لینے والے اور ان کی حوصلہ افزائی کے لئے آنے والے بچوں کا جوش و خروش دیدنی تھا۔ اساتذہ کی بڑی تعداد نے بھی اسپورٹس کیمپ میں شرکت کی۔ ان کا کہنا تھا کہ کھیلوں کی سرگرمیاں طلبا و طالبات کی ذہنی صلاحیتوں اور اعتماد میں اضافے اور ان کی کردار سازی کیلئے ناگزیر ہیں۔نصابی سرگرمیوں میں نمایاں کارکردگی اچھے طلبا و طالبات کی خاصیت ہے، تاہم اس کے ساتھ غیر نصابی سرگرمیوں میں اپنی صلاحیتوں کا مظاہرہ انہیں بہترین انسان بنانے میں اہم کردار ادا کرتا ہے۔ اسکولوں میں تعلیم کے ساتھ ساتھ تفریحی سرگرمیوں سے طلبا نہ صرف جسمانی طور پر مضبوط ہوتے ہیں بلکہ ذہنی نشوونما میں مدد ملتی ہے۔