ہاکی: آسٹریلیا دوسری بارورلڈ چیمپئن بن گیا

نئی دہلی: آسٹریلیا نے دفاعی چیمپیئن جرمنی کو شکست دے کر انیس سو چھیاسی کے بعد دوسری مرتبہ ہاکی ورلڈ کپ جیت لیا۔نئی دہلی کے دھیان چند اسٹیڈیم میں کھیلے جانے والے بارہویں ہاکی ورلڈ کپ کے فائنل میں آسٹریلیا نے دفاعی چیمپیئن جرمنی کو ایک کے مقابلے میں دو سے شکست دی۔ آسٹریلیا کے ایڈورڈ اوکینڈین نے کھیل کے چھٹے منٹ میں گیند کو جال میں پہنچا کر ٹیم کو برتری دلادی جو پہلے ہاف کے اختتام تک برقرار رہی۔ دوسرے ہاف میں جرمنی کے موریٹ فریستے نے اڑتالیسویں منٹ میں پینالٹی کارنر گول کرکے مقابلہ ایک ایک سے برابر کردیا۔ انسٹھویں منٹ میں آسٹریلیا کے لیوک ڈورنر نے پینالٹی کارنر پر گول کرکے ایک بار پھر کینگروز کو برتری دلادی جو کھیل کے اختتام تک برقرار رہی۔ آسٹریلیا نے دوسری مرتبہ ورلڈ کپ جیتنے کا اعزاز حاصل کیا ہے۔ اس سے قبل یلو شارٹس نے انیس سو چھیاسی میں ورلڈ کپ جیتا تھا۔تیسری پوزیشن کے لئے کھیلے جانے والے میچ میں ہالینڈ نے دلچسپ مقابلے کے بعد یورپی چیمپیئن انگلینڈ کو چار تین سے زیر کیا۔