ٹی ٹوئنٹی ورلڈ کپ ،آفریدی کو کپتان مقرر کرنیکا فیصلہ

اسلام آباد: پاکستان کرکٹ بورڈ نے ٹوئنٹی ٹوئنٹی ورلڈکپ کیلئے آل راؤنڈ شاہد آفریدی کو قومی ٹیم کا کپتان مقررکرنے کا فیصلہ کرلیا۔شاہد آفریدی نے پاکستان کرکٹ بورڈ کے چیئرمین اعجاز بٹ سے ان کے نجی دفترمیں ملاقات کی جس میں میگاایونٹ کیلئے قومی ٹیم کے کپتان کی تقرری پر تبادلہ خیال کیا گیا۔ ذرائع کے مطابق اعجاز بٹ نے شاہد آفریدی کو قومی ٹیم کی قیادت کی ذمہ داری سونپنے کا گرین سگنل دے دیا ہے تاہم انہیں کپتان مقرر کرنے کاباقاعدہ نوٹیفکیشن چند روز میں متوقع ہے۔ شاہد آفریدی کو قومی ٹی ٹوئنٹی اسکواڈ کی قیادت سونپی گئی تھی لیکن آسٹریلیا کے خلاف آخری ون ڈے میچ میں بال ٹیمپرنگ کرنے پر آئی سی سی نے ان پر دو میچوں کی پابندی جبکہ بورڈ کی تحقیقاتی کمیٹی نے بھی ان پر تیس لاکھ روپے جرمانہ عائد کیا تھا جس سے ان کی کپتانی خطرے میں پڑ گئی تھی جس کے بعد قومی ٹیم کی قیادت کی دوڑ میں اوپنر سلمان بٹ اور آل راؤنڈر عبدالرزاق بھی شامل ہوگئے تھے۔