ٹور ڈی پاکستان واپڈا کے گلفام کے نام

کراچی : پشاور سے کراچی تک پندرہویں ٹورڈی پاکستان سائیکل ریس واپڈا کے زاہد گلفام نے جیت لی، گیارہواں اورآخری مرحلہ آرمی کے اسدمحمود کے نام رہا۔حیدرآباد سے کراچی تک ریس کا گیارہواں اورآخری مرحلہ ایک سوپچاس کلومیٹرپرمشتمل تھا جس میں چالیس سائیکلسٹس نے حصہ لیا۔ آرمی کے اسد محمودنے چارگھنٹے سینتیس منٹ سات سیکنڈزکے وقت کے ساتھ سب سے پہلے فنشنگ لائن عبورکی۔ سندھ کے عبدالوہاب دوسرے اوربلوچستان کے سلیم گل تیسرے نمبرپررہے۔ واپڈا کے زاہد گلفام نے مجموعی برتری کی بنیاد پرٹائٹل اپنے نام کیا۔ انہوں نے پشاور سے کراچی تک سولہ سو چوہتر کلو میٹر کا فاصلہ چھیالیس گھنٹے اور تیرہ منٹ میں طے کیا۔ سوئی سدرن گیس کے نثار احمد ایک منٹ انیس سیکنڈ کے فرق سے دوسرے نمبر پر آئے جبکہ افغانستان کے حشمت اللہ تیسری پوزیشن حاصل کرنے میں کامیاب ہوئے۔ پاکستان سائیکلنگ فیڈریشن کے سیکریٹری ادریس حیدر خواجہ کا کہنا تھا کہ موٹر وے پولیس سمیت ہر شہرکی انتظامیہ نے ریس کو کامیاب بنانے کے لئے ان کے ساتھ بھرپورتعاون کیا۔ایونٹ کے فاتح سائیکلسٹ زاہد گلفام ڈھائی ہزار ڈالرزکے انعام کا حقدارٹھہرے۔ دوسری پوزیشن حاصل کرنیوالے سائیکلسٹ کو ڈیڑھ ہزار اور تیسرے نمبر پر آنے والے سائیکلسٹ کو ایک ہزار ڈالرانعام دیا گیا۔