پی سی بی: کھلاڑیوں سے جرمانے کی وصولی شروع

لاہور: پاکستان کرکٹ بورڈ نے تحقیقاتی کمیٹی کی رپورٹ پر پانچ کھلاڑیوں پر عائد کئے جانے والے جرمانوں کی وصولی کیلئے رقوم کی کٹوتی شروع کردی ہے۔آسٹریلیا کے ہاتھوں قومی کرکٹ ٹیم کی وائٹ واش شکست کے خلاف پی سی بی کی تحقیقاتی کمیٹی نے شاہد آفریدی،کامران اکمل کو تیس،تیس لاکھ،عمر اکمل،شعیب ملک اور رانا نوید الحسن کو بیس بیس لاکھ روپے جرمانہ کی سزا کی سفارش کی تھی جسے بورڈ نے منظور کرتے ہوئے ان پر عائد کئے جانے والے جرمانے کی رقم،میچ فیس اور سنٹرل کنٹریکٹ سے ادا کی جانیوالی رقوم سے کٹوتی کرلی ہے۔ ذرائع کے مطابق کامران اکمل نے بورڈ کے اعلیٰ حکام سے ملاقات میں ان سے قسطوں میں جرمانہ وصول کرنے کی درخواست کی ہے۔ ذرائع کا کہناہے کہ ٹی ٹوئنٹی قومی اسکواڈ میں دوبارہ جگہ بنانے والے مڈل آرڈر بلے باز مصباح الحق کو بھی پچھلے تین ماہ سے میچ فیس اور سنٹرل کنٹریکٹ کی ادائیگی نہیں کی گئی جبکہ نیوزی لینڈ کے دورے کے دوران عمدہ کارکردگی پر اعلان کردہ رقم اور انعامات کی ادائیگی بھی روک لی گئی ہے۔