آصف باجوہ کو ہٹایا نہیں جا سکتا، قاسم ضیاء

لاہور: پاکستان ہاکی فیڈریشن کے صدر قاسم ضیاء نے کہا ہے کہ ورلڈ کپ میں قومی ٹیم کی بدترین کارکردگی پر منتخب سیکرٹری آصف باجوہ کو آئین کے تحت ہٹایا نہیں بلکہ ان پر عدم اعتماد کیا جا سکتا ہے۔ نیشنل ہاکی اسٹیڈیم لاہور میں میڈیا سے بات چیت کرتے ہوئے قاسم ضیاء نے ورلڈ کپ میں قومی ٹیم کی ناکامیوں میں میچ فکسنگ کے تاثر کو غلط قرار دیتے ہوئے کہا کہ ہاکی میں میچ فکسنگ نہیں ہوتی اگر کسی کے پاس ثبوت ہیں تو وہ پیش کرے۔ ان کا کہنا تھا کہ قومی کھیل کو سیاست کی نظر نہیں ہونے دیا جائے گا ورلڈ کپ میں مایوس کن کارکردگی پر پاکستان ہاکی ختم نہیں ہوئی اور وہ ایشین گیمز سے پہلے بہترین قومی ٹیم تیار کر لیں گے۔ قاسم ضیاء نے ورلڈ کپ میں ناقص کارکردگی کی وجہ کھلاڑیوں اور ٹیم مینجمنٹ کے درمیان اختلافات کو بے بنیاد قرار دیا اور کہا کہ اگر ایسا ہوتا تو تمام کھلاڑی ریٹائرمنٹ کا اعلان نہ کرتے وہ پلیئرز کو وطن واپسی پر سمجھائیں گے۔ قاسم ضیاء کا کہنا تھا کہ شکست کی ذمہ دار ٹیم مینجمنٹ اور قومی سلیکشن کمیٹی تھی لہٰذا انہیں برطرف کردیا گیا ہے اور مینجمنٹ کی رپورٹ کی روشنی میں اعلٰی سطحی تحقیقات کرائی جائے گی،جبکہ مینجمنٹ اور سلیکشن کمیٹی میں سابق اولمپیئنز کی خدمات حاصل کی جائیں گی۔