ٹی20 ورلڈ کپ: قومی اسکواڈ کا اعلان

کراچی: پاکستان کرکٹ بورڈنے ویسٹ انڈیز میں ہونے والے ٹوئنٹی ٹوئنٹی ورلڈ کپ کے لئے بغیرکپتان کے پندرہ رکنی اسکواڈ کا اعلان کردیا۔پی سی بی کے چیف سلیکٹر محسن حسن خان نے نیشنل اسٹیڈیم کراچی میں نیوزکانفرنس میں پندرہ رکنی اسکواڈ کا اعلان کیا۔ ٹیم کے کپتان کا اعلان چیئرمین پی سی بی ٹریننگ کیمپ سے قبل کریں گے۔ پندرہ رکنی اسکواڈ میں سلمان بٹ، محمد حفیظ، خالد لطیف، عمر اکمل، مصباح الحق، فواد عالم، کامران اکمل، شاہد آفریدی، عبدالرزاق، محمد آصف، عمرگل، محمد عامر، سعید اجمل، یاسرعرفات اور حماد اعظم شامل ہیں۔ پندرہ رکنی ٹیم کے علاوہ پانچ ریزروکھلاڑیوں میں شاہ زیب حسن ،محمد سمیع ، رضا حسن ، نوید یاسین اورسرفراز احمد شامل ہیں۔ چیف سلیکٹر کا کہنا تھا کہ انہوں نے چیئرمین پی سی بی کی ہدایت پرکپتان اورکوچ کی مشاورت کے بغیرکھلاڑیوں کا انتخاب کیا ہے اوریہ ٹیم ٹوئنٹی ٹوئنٹی ورلڈکپ کے اعزازکا دفاع کرنے کی صلاحیت رکھتی ہے۔محسن حسن خان کا کہنا تھا کہ کھلاڑیوں کا انتخاب ڈسپلن ،فٹنس اور پرفارمنس کی بنیاد پر کیا گیا ہے۔ ایک سوال پرانہوں نے کہا شاہدآفریدی، کامران اکمل اورعمراکمل پرصرف جرمانہ ہواہے اسلئے چیئرمین پی سی بی کی اجازت سے انہیں ٹیم میں شامل کیا گیا ہے۔چیف سلیکٹرنے دعویٰ کیا کہ آئندہ چارسے پانچ ماہ میں کھلاڑیوں کا بیک اپ تیارکرلیں گیاورکچھ عرصے بعدٹیم کی شکل تبدیل ہوجائے گی۔