ہاکی ٹیم مینجمنٹ اور سلیکشن کمیٹی برطرف

لاہور: پاکستان ہاکی فیڈریشن کے صدر قاسم ضیاء نے ورلڈکپ میں قومی ٹیم کی شرمناک شکست پر ٹیم مینجمنٹ اور قومی سلیکشن کمیٹی کو برطرف کردیا ہے۔ نئی دہلی میں جاری ورلڈ کپ میں قومی ٹیم کو ایک کے سوا تمام پول میچوں میں شکست کا سامنا کرنا پڑا، پاکستانی ٹیم کا گیارہویں پوزیشن کیلئے کینیڈا کے خلاف میچ ہوا اور اس میں بھی اسے شکست ہوئی۔ ورلڈکپ کی تاریخ میں پہلی بار آخری پوزیشن پر رہی ہے۔ پی ایچ ایف کے صدر قاسم ضیاء نے اس شرمناک شکست پر منیجر آصف باجوہ، کوچ شاہد علی خان اور معاون کوچ شفقت ملک پر مشتمل ٹیم مینجمنٹ جبکہ چیف سلیکٹر حسن سردار اور چار ممبران رانا مجاہد علی، خالد بشیر، فرحت خان اور محمد شفیق پر مشتمل قومی سلیکشن کمیٹی کو توڑ دیا۔ شکست خوردہ قومی ٹیم کی بھارت سے وطن واپسی پر ایگزیکٹو بورڈ کا اجلاس طلب کیا جائے گا اور میگا ایونٹ میں شکست کے متعلق اعلٰی سطحی تحقیقات کرائی جائے گی۔ فیڈریشن کے ترجمان کے مطابق آصف باجوہ بدستور سیکرٹری کی ذمہ داریاں انجام دیتے رہیں گے۔