ہاکی ورلڈ کپ: پاکستان بارہویں نمبرپر

نئی دہلی: ہاکی ورلڈ کپ میں گیارہویں پوزیشن کے لئے کھیلے گئے میچ میں کینیڈا نے پاکستان کو شکست دے دی۔ قومی ٹیم ٹورنامنٹ میں آخری پوزشن حاصل کرسکی۔ نئی دہلی کے دھیان چند اسٹیڈیم میں کھیلے جانے والے میچ میں کینیڈا نے پاکستان کودوکے مقابلے میں تین گول سے شکست دی۔ پاکستان نے کھیل کے آغاز پر ہی ریحان بٹ کے گول کی بدولت برتری حاصل کرلی لیکن تیرہویں منٹ میں کینیڈا کے کونرگرائمز نے گیند کو جال میں پہنچا کر مقابلہ ایک ایک سے برابر کردیا۔ سینتالیسویں منٹ میں اختر علی نے گول کرکے پاکستان کو ایک مرتبہ پھربرتری دلائی جو زیادہ دیر تک برقرار نہ رہ سکی اوردس منٹ بعد مارک پئیرسن نے گول کرکے مقابلہ برابر کردیا۔ مقررہ وقت تک مقابلہ دودوگول سے برابررہنے کے بعد میچ کو فیصلہ کن بنانے کے لئے اضافی وقت دیا گیا جس کے دوسرے ہاف میں کینیڈا نے پینالٹی کارنر پر گول کرکے میچ جیت لیا۔ پاکستان ورلڈکپ کی تاریخ میں پہلی مرتبہ بارہویں پوزیش حاصل کی۔ اس سے قبل پاکستان کی سب سے خراب کارکردگی انیس سو چھیاسی کے ورلڈ کپ میں رہی تھی جس میں قومی ٹیم نے بھارت کو شکست دے کر گیارہویں پوزیشن حاصل کی تھی۔ پاکستان ٹیم ورلڈکپ میں چھ میں سے صرف ایک میچ جیتنے میں کامیاب ہوسکی۔