ٹورڈی پاکستان: آٹھواں مرحلہ افغانستان کے نام

سکھر: ٹور ڈی پاکستان سائیکل ریس کا آٹھواں مرحلہ افغانستان کے حشمت اللہ خان نے جیت لیا۔رحیم یار خان سے سکھر تک ریس کا آٹھواں مرحلہ ایک سو چھہتر کلومیٹر پر مشتمل تھا جس میں اکتالیس سائیکلسٹس نے حصہ لیا۔ افغانستان کے حشمت اللہ نے شاندار کارکردگی کا مظاہرہ کرتے ہوئے واپڈا کے ہارون رشید اور سوئی سدرن گیس کے صابر احمد کو پیچھے چھوڑتے ہوئے سب سے پہلے فنشنگ لائن عبور کی۔ حشمت اللہ نے مقررہ فاصلہ چار گھنٹے باون منٹ اور ایک سیکنڈ میں طے کیا۔ واپڈا کے ہارون رشید دوسرے اور سوئی سدرن گیس کے صابر احمد تیسرے نمبر پر رہے۔ آٹھویں مرحلے کے اختتام پر واپڈا کے زاہد گلفام کو مجموعی برتری حاصل ہے۔ سوئی سدرن گیس کے نثار احمد دوسرے نمبر پر ہیں۔ سائکلسٹس کا سکھر پہنچنے پر ڈی سی او ایڈ منسٹریٹر عبدالمجید پٹھان اور موٹروے پولیس کے عہدیداروں نے استقبال کیا۔ ریس کے شرکا نویں مرحلے کے لئے کل سکھر سے مورو کے لئے روانہ ہوں گے۔