یوسف، یونس پر غیر معینہ مدت تک پابندی

لاہور: پاکستان کرکٹ بورڈ نے دورہ آسٹریلیا کی تحقیقاتی کمیٹی کی سفارشات پر عمل کرتے ہوئے سابق کپتان محمد یوسف اور یونس خان کی قومی ٹیم میں شمولیت پرغیرمعینہ مدت تک پابندی عائد کردی ہے۔ جبکہ شعیب ملک اور آل راؤنڈر رانا نوید الحسن پر ایک سال کی پابندی عائد کردی ہے۔ ڈسپلن کی خلاف ورزی کے سبب کامران اکمل، عمراکمل اور شاہد آفریدی پربھاری جرمانہ کیا گیا ہے۔ پاکستان ٹیم کو آسٹریلیا کے خلاف ٹیسٹ سیریز میں تین صفر سے اور ون ڈے سیریز میں پانچ صفرسے شکست کا سامنا کرنا پڑا تھا۔ جبکہ واحد ٹوئنٹی ٹوئنٹی میچ میں بھی پاکستان ٹیم کو شکست ہوئی تھی۔ قومی ٹیم کی وطن واپسی کے بعد پی سی بی نے دورہ آسٹریلیا میں ٹیم کی بدترین کارکردگی کی تفصیلات جاننے کے لئے چیف ایگزیکٹو آفیسر وسیم باری کی سربراہی میں چھ رکنی تحقیقاتی کمیٹی بنائی جس نے ٹیم کے کوچ انتخاب عالم، کپتان محمد یوسف او منیجرعبدالرقیب سمیت تیرہ کھلاڑیوں اورآفیشلز کے بیانات کی روشنی میں اپنی سفارشات مرتب کیں۔ پی سی بی نے کمیٹی کی سفارشات منظورکرتے ہوئے محمدیوسف اوریونس خان کوغیرمعینہ مدت تک تینوں فارمیٹس کیلئے ٹیم میں شامل نہ کرنیکا فیصلہ کیا ہے۔ نظم وضبط کی خلاف ورزی پرشعیب ملک اورآل راؤنڈررانا نوید الحسن پرایک سال تک انٹرنیشنل کرکٹ کھیلنے کی پابندی اوربیس بیس لاکھ روپیجرمانہ عائد کیا گیا ہے۔ ٹوئنٹی ٹوئنٹی ٹیم کے کپتان شاہدآفریدی بال ٹیمپرنگ کی وجہ سے تیس لاکھ اورڈسپلن کی خلاف ورزی کے مرتکب کامران اکمل بھی تیس لاکھ روپے جرمانے کی زد میں آئے جبکہ عمراکمل پربیس لاکھ روپے جرمانہ عائد کیا گیا ہے۔ شاہد آفریدی اوراکمل برادرزکے رویے کوچھ ماہ تک مانیٹرکیا جائیگا۔