ڈیوس کپ کی منتقلی کی تجویز مسترد

لاہور: پاکستان نے نیوزی لینڈ کی جانب سے سیکورٹی خدشات کے سبب ڈیوس کپ ٹینس ٹائی کو نیوزی لینڈ یا کسی نیوٹرل وینیو پرمنتقل کرنے کی تجویز کی مخالفت کردی۔ رواں سال نو سے گیارہ جولائی تک ڈیوس کپ ایشیا اوشیانہ زون گروپ ٹو کا سیمی فائنل پاکستان اور نیوزی لینڈ کے درمیان پاکستان میں شیڈول ہے لیکن ٹینس نیوزی لینڈ نے پاکستان آنے سے انکار کرتے ہوئے آئی ٹی ایف سے ٹائی کو نیوزی لینڈ یا نیوٹرل وینیو پر منتقل کرنے کا مطالبہ کیا تھا جس کی پاکستان نے مخالفت کردی ہے۔ پاکستان ٹینس فیڈریشن کے سیکرٹری راشد خان کا کہنا ہے کہ نیوزی لینڈ پاکستان کا دورہ کرے یا میچز سے دستبردار ہوجائے۔ انہوں نے کہا کہ وہ چاہتے ہیں آئی ٹی ایف، ٹائی کی میزبانی پاکستان کو ہی کرنے دے اگر نہیں تو نیوزی لینڈ کے خلاف پاکستان کو واک اوور دے دیا جائے۔ راشد خان نے بھارت کا حوالہ دیتے ہوئے کہا کہ سیکورٹی صورتحال کے سبب آسٹریلیا نے بھارتی شہر چنائی میں کھیلنے سے معذرت کی تھی جس پر آئی ٹی ایف نے کینگروز پر دس ہزار ڈالر جرمانہ عائد کیا تھا اور بھارت کو واک اوور دے دیا گیا تھا۔