شمالی وزیرستان:4 ڈرون حملے ،16 افراد ہلاک

وانا: شمالی وزیرستان کی تحصیل میرام شاہ میں رات گئے ایک اور ڈرون حملہ کیا گیا۔ جس میں مزید دو افراد ہلاک جب کہ پانچ زخمی ہو گئے۔حکام کے مطابق جاسوس طیاروں نے گاوٴں میں موجود دو مکانات پر راکٹ فائر کیے جس سے دو افراد موقع پر ہلاک ہو گئے۔ اس طرح چوبیس گھنٹوں میں ہونے والے چار ڈرون حملوں میں ہلاک ہونے والوں کی تعداد سولہ ہو گئی ہے۔ پہلا حملہ میران شاہ سے پانچ کلومیٹر شمال مغرب میں واقع ڈانڈے درپہ خیل میں کمپاونڈ پر کیا گیا۔ حملے سے کمپاوٴنڈ کی عمارت مکمل طور پر تباہ اور چھ افراد ہلاک ہوگئے۔ اے ایف پی کے مطابق میزائل مقامی عسکریت پسند کمانڈر عبدالعزیز کے گھر پر داغے گئے۔دوسرا ڈرون حملہ بھی اسی علاقے میں کیا گیا جس میں چار ہلاکتیں ہوئیں۔ تیسرا ڈرون حملہ تحصیل دتہ کے علاقے انبور شگہ میں ایک گاڑی پر کیا گیا جس میں چار افراد ہلاک ہوئے۔ چوتھے حملے میں مزید دو افراد ہلاک ہوگئے ہیں۔