ٹھٹھہ:کوٹ عالموبندکا شگاف تاحال پر نہ کیاجاسکا

ٹھٹھہ: ٹھٹھہ کے کوٹ عالمو بند میں پڑنے والا شگاف اب تک پر نہ کیا جاسکا۔ پیپلز پارٹی نے چیف انجینئر محکمہ آب پاشی کے خلاف دہشت گردی کا مقدمہ درج کرکے گرفتار کرنے کا مطالبہ کردیا۔ فوزیہ وہاب نے کہا ہے کہ صدر نے ٹھٹھہ کو پان بیلٹ بنانے کا فیصلہ کیا ہے۔ بخاری ہاوٴس مکلی میں میڈیا سے بات چیت میں پیپلز پارٹی کی سیکریٹری اطلاعات فوزیہ وہاب نے کہا کہ پوری قوم سیلاب متاثرین کے ساتھ کھڑی ہے۔ سروے کی تکمیل کے بعد فی خاندان بیس ہزار روپے تقسیم کردیے جائیں گے۔ انہوں نے کہا کہ ٹھٹھہ کے موسم کے مطابق صدر نے اسے پان بیلٹ بنانے کا فیصلہ کیا ہے۔ ٹھٹھہ کے رکن قومی اسمبلی ڈاکٹر عبدالوحد سومرو نے کہا ہے کہ محکمہ آبپاشی عملے نے سپر فلڈ کو مذاق بنا رکھا ہے۔ چیف انجینئر کا نام ای سی ایل میں شامل کرکے دہشت گردی ایکٹ کے تحت مقدمہ درج کیا جائے۔ دوسری جانب کوٹ عالمو کے مقام پر ایم ایس بند میں پڑنے والا شگاف اب تک پْر نہیں کیا جاسکا ہے۔ شگاف چودہ سو فٹ چوڑا ہوچکا ہے۔ محکمہ آبپاشی کے مطابق دریائے سندھ میں پانی کا بہاو ساڑھے تین لاکھ کیوسک سے کم ہونے پر ہی شگاف پْر کرنا ممکن ہوسکے گا۔