سعودی سفیر کاسیلاب متاثرین کیساتھ عید منانے کااعلان

اسلام آباد: سعودی عرب نے امدادی سامان کے مزید ایک سو ٹرک سیلاب سے متاثرہ علاقوں میں بھیج دئیے، سعودی سفیر عبدالعزیز بن الغدیر نے کہا ہے کہ وہ عید سیلاب متاثرین کے ساتھ منائیں گے۔اسلام آباد میں امدادی سامان کی خیبر پختونخواہ روانگی کی تقریب میں وزیر اطلاعات قمر زمان کائرہ سمیت چار وفاقی وزراء نے شرکت کی۔ اس موقع پرسعودی سفیر نے کہا کہ ایک ہزار ٹن امدادی سامان خیبر پختونخواہ، بلوچستان اور سندھ کے پچیس ہزار متاثرہ خاندانوں میں تقسیم کیا جائے گا، سعودی عوام نے متاثرین سیلاب کے لیے ایک سو سات ملین ڈالر کی امدادی رقم جمع کی ہے، متاثرین کی بحالی تک امداد جاری رکھی جائے گی۔ سعودی سفیر نے کہا کہ سعودی عرب کے ڈاکٹروں سمیت پانچ سو افراد پر مشتمل طبی عملہ سیلاب زدگان کی خدمت میں مصروف ہے۔ آئندہ تین ماہ میں بیس لاکھ متاثرین کی خوراک کی ضروریات پوری کریں گے۔