شمالی وزیرستان : دو ڈرون حملے، نو ہلاک

پشاور: شمالی وزیرستان میں دو ڈرون حملوں میں نو افراد ہلاک اور متعدد زخمی ہوگئے۔ پہلا حملہ آج صبح سویرے شمالی وزیرستان کے ہیڈ کوارٹر میرانشاہ سے پانچ کلومیٹر شمال مغرب میں ڈانڈے درپہ خیل میں کیا گیا۔ ہوا باز کے بغیر چلنے والے جاسوس طیارے سے ایک کمپاوٴنڈ پر دو میزائل داغے گئے۔ حملے سے گھر مکمل طور پر تباہ ہوگیا۔ چھ افراد ہلاک اور متعدد زخمی ہوئے۔ ہلاکتوں میں اضافے کا خدشہ ہے۔ فرانسییسی خبر رساں ادارے نے حکام کے حوالے سے بتایا ہے کہ میزائل مقامی عسکریت پسند کمانڈر عبدالعزیز کے گھر پر داغے گئے اور اس حملے میں کم از کم دس افراد ہلاک ہوئے۔ دوسرا حملہ شمالی وزیرستان کی تحصیل دتہ خیل کے علاقے انبور شگہ میں کیا گیا۔ میزائل ایک گاڑی پر داغے گئے۔ اس حملے میں تین افراد ہلاک ہوئے۔ گاڑی مکمل طورپر تباہ ہوگئی۔ اے ایف پی کے مطابق مرنے والوں کی تعداد چار ہے۔ قبائلی علاقہ جات میں چھ دن میں چھ حملے ہوچکے ہیں۔ اگست دو ہزار آٹھ سے پاکستان میں ایک سوبائیس ڈرون حملوں میں ایک ہزار چالیس افراد ہلاک ہوچکے ہیں۔