حیدرآباد: متاثرین سیلاب آپس میں دست و گریباں

حیدرآباد: حیدرآباد میں امدادی سامان کی تقسیم پر متاثرین سیلاب آپس میں دست و گریباں ہوگئے۔ جھگڑے کے دوران اینٹوں اور ڈنڈوں کے آزادانہ استعمال کے باعث پندرہ متاثرین زخمی ہوگئے۔نیو سبزی منڈی حیدرآباد کے ریلیف کیمپ میں امدادی سامان اور کپڑوں کی تقسیم کے دوران دو گروہ متصادم ہوگئے۔جس کے نتیجے میں پندرہ افراد زخمی ہوگئے متاثرین کا کہنا ہے کہ ریلیف کیمپ میں امدادی سامان کی تقسیم کا منصفانہ نظام نہ ہونے کی وجہ سے پرتشدد واقعات رونما ہورہے ہیں۔ حیدرآباد کے گورنمنٹ کالج موری میں قائم ریلیف کیمپ میں مناسب سہولیات نہ ہونے کی وجہ سے متاثرین کو شدید مشکلات کا سامنا ہے۔ متاثرین کا کہنا ہے کہ رجسٹریشن کرائے جانے کے باوجود انہیں کھانا فراہم نہیں کیا جارہا۔ لاڑکانہ میں سیلاب متاثرین نے راشن اور طبی سہولتوں کی عدم فراہمی کے خلاف مونو ٹیکنیکل کالج کے سامنے احتجاج کرتے ہوئے لاڑکانہ کراچی قومی شاہراہ پر دھرنا دیا۔ میونسپل اسٹیڈیم کیمپ میں انتظامیہ کی جانب سے پکے ہوئے کھانے کی فراہمی بند کئے جانے کے خلاف متاثرین نے احتجاج کیا۔ پولیس نے مظاہرین کو منتشر کرنے کے لیے لاٹھی چارج کیا اور آنسو گیس کے شیل فائر کئے۔