سندھ: متاثرین کی مدد کیلئے طالبعلم پیش پیش

کراچی: سندھ کے طلبہ وطالبات کی رضاکار فورس فنڈ جمع کرنے ،اور امدادی اشیاء متاثرین سیلاب تک پہنچانے میں حکومت کی مدد کررہی ہے۔ سندھ کی پبلک اور پرائیویٹ سیکٹر کی یونیورسٹیز سے تعلق رکھنے والے ان طلبہ وطالبات کے لئے گورنر ہاؤس کراچی کو ریلیف مرکز میں تبدیل کردیا گیا ہے جہاں گورنر سندھ کی نگرانی میں یہ طلبہ وطالبات انسانی جذبے سے سرشار امدادی اشیاء کی پیکنگ ہی نہیں بلکہ انہیں امدادی کمپیوں تک پہنچانے کے لئے کوشاں ہیں۔ جامعہ کراچی کے اساتذہ بھی اس کارخیر میں پیچھے نہیں رہے۔ انہوں نے ایک دن کی تنخواہ اور پینتیس لاکھ روپے کی امدادی اشیاء بھی متاثرین تک پہنچائی۔ گورنر سندھ ڈاکٹر عشرت العباد خان کی تحریک نے سندھ کی پرائیویٹ اور سرکاری یونیورسٹیز کے تین لاکھ سے زائد طلبہ و طالبات میں اپنے مصیبت زدہ بھائیوں کی مدد کا جذبہ بیدار کردیا ہے اور میدان عمل میں کود پڑے ہیں۔ گورنر سندھ نے طلبہ وطالبات کی امدادی سرگرمیوں کے لئے گورنر ہاؤس کے دروازے کھول دیئے ہیں جہاں یہ رضاکار طلبہ وطالبات فنکار اور دیگر مفرد احساس ور جذبے سے کام میں مصروف ہیں گورنر ڈاکٹر عشرت العباد چاند رات گورنر ہاوس میں متاثرین سیلاب کے ساتھ منائیں گے۔