کراچی: فائرنگ، مولانا احسان اللہ جاں بحق

کراچی: کراچی میں نامعلوم افراد نے فائرنگ کرکے اہلسنت والجماعت کے ترجمان احسان اللہ فاروقی کو قتل کردیا۔ نماز جنازہ کل ادا کی جائے گی۔احسان اللہ فاروقی کو گرومندر میں نامعلوم موٹرسائیکل سواروں نے پنکچر کی دکان پر نشانہ بنایا۔ فائرنگ سے مولانا احسان اللہ فاروقی اور ایک اور شخص زخمی ہوا۔ اسپتال منتقلی کے دوران احسان اللہ فاروقی دم توڑ گئے۔ اہلسنت والجماعت نے جمعہ کو سندھ بھر میں یوم احتجاج منانے کا اعلان کیا ہے۔ تنظیم کے اعلامیہ کے مطابق ٹارگٹ کلنگ کے خلاف عید کے بعد سکھر تا کراچی لانگ مارچ ہوگا اور وزیراعلٰی ہاؤس کا گھیراؤ کیا جائے گا۔ اعلامیہ میں کہا گیا ہے کہ کراچی اہلسنت والجماعت کے لیے مقتل گاہ بن گیا ہے اور وزیرداخلہ رحمان ملک قاتلوں کے سرپرست ہیں۔ احسان اللہ فاروقی کے قتل سے پہلے اہلسنت والجماعت کراچی ڈویژن کے صدرمولانا اورنگ زیب فاروقی نے نیوز کانفرنس میں کہا کہ وزیر داخلہ ذمہ داری پوری نہیں کرسکتے تو مستعفیٰ ہوجائیں۔ انہوں نے کراچی میں امن و امان کے قیام اور ٹارگٹ کلنگ کے خاتمے کے لیے مذہبی جلوسوں پر پابندی عائد کرنے کا بھی مطالبہ کیا۔