ایک سو اٹھاسی خواتین ارکان اسمبلی کی اہلیت چیلنج

لاہور: سپریم کورٹ کی لاہور رجسٹری میں مخصوص نشستوں پر منتخب ہونے والی قومی اور صوبائی اسمبلی کی ایک سو اٹھاسی خواتین ارکان کی اہلیت چیلنج کردی گئی۔سپریم کورٹ کی لاہور رجسٹری میں ایڈوکیٹ طارق عزیز کی جانب سے دائر پٹیشن میں موقف اختیار کیا گیا ہے کہ قومی اور صوبائی اسمبلیوں کی ایک سو اٹھاسی نشستیں خواتین کے لئے مخصوص کی گئی ہیں۔ درخواست میں کہا گیا ہے کہ یہ خواتین عوام کی منتخب نمائندہ نہیں لیکن اس کے باوجود انہیں بجٹ سے سالانہ پینتالیس کروڑ روپے سے زائد کی رقم تنخواہوں کی مد میں دی جا رہی ہیں۔ درخواست میں استدعا کی گئی ہے کہ اسمبلیوں سے مخصوص نشستوں کو فوری ختم کرنے کے احکامات جاری کئے جائیں۔