پی پی مخالفین متاثرین کو ورغلا رہے ہیں، ایاز سومرو

لاڑکانہ: سندھ کے وزیر قانون ایاز سومرو نے کہا ہے کہ لاڑکانہ میں پیپلز پارٹی کے مخالفین سازش کے تحت سیلاب متاثرین کو ورغلا کر ہنگامے کرارہے ہیں۔ اب پی پی کے جھنڈے جلے تو مخالفین کے جھنڈے بھی جلیں گے۔ سرکٹ ہاؤس لاڑکانہ میں ریلیف کمیٹی کے اجلاس کے دوران ایاز سومرو نے سیلاب متاثرین کی جانب سے جھنڈے جلائے جانے کی مذمت کی۔ ایاز سومرو نے کہا کہ حکومت کے خلاف سازش اور ہنگامہ کرنے والوں سے سختی سے نمٹا جائے گا۔ امن و امان کا مسئلہ پیدا نہیں ہونے دیں گے۔ ایاز سومرو نے کہا کہ لاڑکانہ میں دو لاکھ متاثرین موجود ہیں جنہیں صوبائی اور ضلعی حکومت ہرممکن امداد مہیا کررہی ہے۔ متاثرین کے کیمپوں میں گندگی اور کچرے کے خاتمے کے لیے سو خاکروب یومیہ اجرت پر بھرتی کیے جائیں گے۔ ضلع کے سات سو چار کیمپوں میں صفائی کا نظام بہتر بنایا جائے گا۔ ایاز سومرو نے بتایا کہ عید سے قبل لاڑکانہ میں متاثرین کے خاندانوں کو پندرہ دن کا راشن فراہم کیا جائے گا۔