نیب حکام کاعہدہ چھوڑنے سے انکار

اسلام آباد: نیب کے حکام نے عدالت اور حکومت کے احکامات ہوا میں اڑا دیئے۔ قائم مقام چیئرمین اور پراسیکیوٹر جنرل نے عہدہ چھوڑنے سے انکار کر دیا۔وزیراعظم نے سیکریٹری قانون کو ہدایت کی کہ سپریم کورٹ کے حکم کی روشنی میں عرفان قادر کو حاصل تمام سرکاری مراعات اور سہولیات واپس لے لی جائیں۔ لیکن عرفان قادر نیب کے دفتر بھی گئے اور تمام سرکاری مراعات اور سہولیات بھی استعمال کرتے رہے۔ نیب کے پراسیکیوٹر جنرل کا موقف ہے کہ ان کی تعیناتی صدر مملکت نے کی تھی جب تک انہیں تحریری احکامات موصول نہیں ہوتے وہ اپنی ذمہ داریاں جاری رکھیں گے۔ عرفان قادر کے مطابق نیب وزارت قانون کے ماتحت نہیں ، کسی کو اگر پتہ نہیں تو وہ نیب کا قانون دیکھ لے۔ ڈپٹی چیئرمین نیب جاوید قاضی نے بھی قائم مقام چیئرمین کا عہدہ چھوڑنے سے انکار کیا ہے۔ ذرائع کے مطابق نیب مقدمات کی فہرستیں بھی جاوید قاضی کے دستخطوں سے جاری کی جا رہی ہیں۔