متاثرین کیلئے ہیلی کاپٹر آپریشنز کی سندھ تک توسیع

کراچی: امریکا نے سیلاب زدگان کی امداد کیلئے ہیلی کاپٹر آپریشنز کی سندھ تک توسیع کا اعلان کردیا۔ پنو عاقل ایئر بیس پر ہیلی کاپٹر آپریشن سینٹر قائم کردیا گیا۔امریکی قونصل جنرل ولیم مارٹن نے کراچی میں نیوز کانفرنس میں بتایا کہ مجموعی طور پر آٹھ ہیلی کاپٹر سندھ میں ریلیف آپریشن میں حصہ لیں گے۔ پنو عاقل ائیر بیس امداد کی فراہمی کیلئے استعمال کی جارہی ہے۔ دو ہیلی کاپٹر غازی بیس سے جبکہ دو ہیلی کاپٹر امریکی بیڑے یو اسیس ایس پلیلیو سے پاکستان پہنچے ہیں۔ امریکی نیول کمانڈر ایڈمرل سنکلئیر ہیرس نے بتایا کہ سندھ میں گزشتہ پانچ روزہ آپریشن کے دوران بیس ہزار سے زائد کلو گرام امداد فراہم کی جاچکی ہے۔