سیلاب سے نمٹنے کیلئے جامع پالیسی بنائی جائے،عمران

لاہور: پاکستان تحریک انصاف کے سربراہ عمران خان نے کہا ہے کہ سیلاب کی تباہ کاریوں کا مقابلہ سیاسی مفادات سے بالاتر ہو کر ہی کیا جاسکتا ہے۔ لاہور میں سیلاب زدگان کیلئے امدادی رقوم کے چیک وصول کرنے کے موقع پر میڈیا سے بات چیت کرتے ہوئے عمران خان نے کہا کہ سیلاب کی آفت سے نمٹنے کیلئے جامع پالیسی بنائی جائے تاکہ آنے والے دنوں میں مہنگائی،قحط اور بیماریوں جیسی آفات کا مقابلہ کیا جاسکے، انہوں نے کہا متاثرہ علاقوں کو تقسیم کر کے تعمیراتی کاموں کا آغاز کیا جائے۔ ایک سوال پر عمران خان نے کہا کہ بعض عناصر ذاتی مفادات کیلئے عدلیہ کو نقصان پہنچانا چاہتے ہیں اگرایسا ہوا تو وہ اس کے خلاف سڑکوں پر نکلیں گے۔تحریک انصاف کے سربراہ نے کہا کہ حکومت امریکا کی جنگ سے باہر نکل آئے تو نوے روز میں ملک سے دہشت گردی کا خاتمہ کیا جاسکتا ہے۔