لاہور: شریف برادران کی جائیداد کی دستاویزات پیش کرنیکا حکم

لاہور: لاہور ہائیکورٹ نے نیب کو شریف برادران کی جائیداد کی دستاویزات اور یئیرز سرٹیفکیٹ نو ستمبر تک عدالت میں پیش کرنے کا حکم دے دیا ہے۔لاہور ہائیکورٹ کے جسٹس اعجاز الاحسن اور جسٹس سید منصور علی شاہ پر مشتمل دو روکنی بنچ نواز شریف، شہباز شریف اور خاندان کے دیگر افراد کی جانب سے دائر پٹیشن کی سماعت کررہا ہے۔ ڈائریکٹر جنرل نیب رانا زاہد محمود نے عدالت کے روبرو پیش ہوکر بتایا کہ شریف خاندان کی جائیداد کا کچھ ریکارڈ لاہور اور کچھ اسلام آباد میں ہے، عدالت کو بتایا گیا کہ چیئرمین نیب کا تقرر نہیں ہوا اس لئے ساڑھے گیارہ کروڑ روہے کیش نہیں نکلوائے جاسکتے،جس پر فاضل عدالت نے قرار دیا کہ عملے کی تنخواہ چیئرمین کے بغیر نکلوائی جاسکتی ہے جو یہ رقم کیوں نہیں، عدالت نے مزید قرار دیا کہ رقم کا ڈرافٹ بنا کر ڈپٹی رجسٹرار جوڈیشل کے حوالے کردیا جائے۔ کیس کا فیصلہ شریف خاندان کے حق میں ہوا تو ریکارڈ اور رقم ان کو دے دی جائے گی اور فیصلہ خلاف آنے کی صورت میں نیب حکام کو واپس کردی جائے گی۔ عدالت نے ڈی جی نیب کو حکم دیا ہے کہ آئندہ سماعت پر مکمل ریکارڈ عدالت میں پیش کردیا جائے۔پٹیشن میں موقف اختیار کیا گیا ہے کہ بارہ اکتوبر انیس سو ننانوے کے بعد نیب نے شریف خاندان کی اربوں روپے کی جائیداد،شیئر سرٹیفکیٹ اور نقد رقم تحویل میں لے لی تھی۔ درخواست گزار کے مطابق سندھ ہائیکورٹ اور سپریم کورٹ شریف برادران کے خلاف مقدمات ختم کرچکی ہے لیکن کاغذات اور کیش اب بھی نیب حکام کے پاس ہیں اور اس بات کا خدشہ ہے کہ دستاویزات کا غلط استعمال کرکے انہیں ہراساں کیا جا سکتا ہے۔