عید الفطر پر پانچ خصوصی ٹرینیں چلائی جائیں گی

لاہور: پاکستان ریلویز عیدالفطر کے موقع پر اضافی رش کے پیش نظر پانچ خصوصی ٹرینیں چلائے گا۔ لاہور میں ریلوے انتظامیہ کے مطابق پہلی خصوصی ٹرین سات ستمبر کو دن بارہ بجے کراچی کینٹ سے روانہ ہو گی جو حیدرآباد، روہڑی، ملتان اور لاہور کے راستے اگلے روز رات نو بجکر پینتالیس منٹ پر پشاور کینٹ پہنچے گی۔ دوسری ٹرین آٹھ ستمبر کو کراچی کینٹ سے دوپہر ایک بجے روانہ ہوکر اگلے روز دوپہر گیارہ بجکر تیس منٹ پر لاہور پہنچے گی۔ تیسری ٹرین نو ستمبر کو لاہور سے دن گیارہ بجے روانہ ہوکر براستہ گوجرانوالہ، گجرات شام چار بجکر پندرہ منٹ پر راولپنڈی پہنچے گی۔ اسی دن چوتھی ٹرین راولپنڈی سے شام سات بجے روانہ ہو کر رات بارہ بجکر پندرہ منٹ پر لاہور پہنچے گی۔ پانچویں سپیشل ٹرین آٹھ ستمبر کو پشاور کینٹ سے شام پانچ بجکر تیس منٹ پر روانہ ہوکر وزیر آباد اور گوجرانوالہ کے راستے اگلے روز صبح نو بجے لاہور پہنچے گی۔