مردان: خودکش دھماکا، حملہ آور سمیت دو افراد ہلاک

مردان: مردان میں احمدیوں کی عبادت گاہ پر خودکش حملے کی کوشش میں حملہ آور سمیت دو افراد ہلاک ہوگئے۔ پشاور میں پولیس موبائل پر ریموٹ کنٹرول حملہ میں ایک اہلکار جاں بحق اور اے ایس ائی سمیت تین اہلکار زخمی ہوگئے ہیں۔ پشت خرہ میں پولیس موبائل معمول کی گشت پر تھی کہ اچانک ریموٹ کنٹرول دھماکا ہوا۔ جس میں کمیونٹی پولیس اہلکار شبیر جاں بحق جبکہ اے ایس آئی افتخار، کانسٹیبل امجد اور کانسٹیبل شاہ سعود زخمی ہوگئے ہیں۔ دھماکے سے پولیس موبائل کو بھی نقصان پہنچا، زخمیوں کو حیات آباد میڈیکل کمپلیکس منتقل کردیا گیا ہے۔ مردان پولیس کے مطابق نامعلوم خود کش حملہ آورنے کینال روڈ کی گلی میں احمدیوں کی عبادت گاہ میں داخل ہونے کی کوشش کی۔ جس پر وہاں موجود چوکیدار نے حملہ آور کو للکارا اور اس پر فائرنگ کردی۔ فائرنگ سے خود کش حملہ آور کے گرد لپٹا بارودی مواد پھٹ گیا۔دھماکے سے خودکش حملہ آور اور قریبی موجود شخص ہلاک اور دو افراد زخمی ہوگئے۔ زخمیوں کو ڈسٹرکٹ ہیڈ کوارٹر اسپتال منتقل کردیا گیا ہے۔