ٹھٹھہ: بین الاقوامی تنظیم کے دو میڈیکل کیمپس قائم

ٹھٹھہ: سیلاب سے متاثر افراد کی امداد کیلئے ہر سطح پر کوششیں جاری ہیں۔ سندھ میں ترکی اور ڈاکٹروں کی بین الاقوامی تنظیم نے دو میڈیکل کیمپس قائم کر دیئے۔ ترکی نے سندھ کے تاریخی شہر ٹھٹھہ میں سیلاب زدگان کو صحت کی بنیادی سہولتیں فراہم کرنے کیلئے میڈیکل کیمپ قائم کیا ہے۔ اس کیمپ میں روزانہ چھ سو افراد کو طبی سہولت فراہم کی جا رہی ہے۔ ڈاکٹروں کی بین الاقوامی تنظیم میڈیسنز سانز فرنٹیئرز نے سیلاب متاثرین کی امداد کیلئے اپنا دائرہ پاکستان کے شمالی علاقوں سے جنوب تک پھیلا رکھا ہے۔ خیبر پختونخوا اور پنجاب کے بعد سندھ میں بھی ڈاکٹرز بیونڈ بارڈرز نے نیا میڈیکل سینٹر قائم کیا ہے۔ سکھر ریلوے اسپتال کا نصف انتظام اس تنظیم نے سنبھال لیا ہے۔ یہاں پیٹ، جلد اور آنکھوں کی بیماریوں میں مبتلا افراد کے علاج کے ساتھ غذائی قلت کے شکار بچوں کی بھی دیکھ بھال کی جا رہی ہے۔ میڈیسنز سانز فرنٹیئرز پیٹ کے امراض کی روک تھام کیلئے پینے کا صاف پانی بھی فراہم کر رہی ہے۔ ٹھٹھہ کے قریب پاک بحریہ نے خوراک کی فراہمی کا مرکز قائم کر دیا ہے جہاں متاثرین کو امداد تقسیم کی جا رہی ہے۔